"လက်မထပ်မီ သွေးစစ်ခြင်း"

"လက်မထပ်မီ သွေးစစ်ခြင်း"

မင်္ဂလာမှုပြု လက်ဆက်ကြမည့်သူများအတွက်
အလွန်အလုပ်ရှုပ်သောကာလတစ်ခု ရောက်ရှိလာပြီဟု ဆိုရမည်ဖြစ်သည်။ မည်သို့ပင် မအားလပ်လောက်အောင် အချိန်မရှိဖြစ်နေပါစေ၊ မိမိဘဝအတွက် (သို့တည်းမဟုတ်) မိမိ၏ နောက်လာမည့်အနာဂတ် မိသားစုဘဝအတွက် လုံခြုံစိတ်ချမှု အပြည့်အဝရရှိနိုင်စေရန် မလုပ်မဖြစ် လုပ်သင့်သောအရာမှာ “လက်မထပ်မီသွေးစစ်ခြင်း” ပင်ဖြစ်ပါသည်။

ယင်းအတွက်ကြောင့် လက်မထပ်မီ စစ်ဆေးသင့်သည့် ရောဂါများနှင့်ပတ်သက်ပြီး သက်ဆိုင်ရာ ပညာရှင်များ၏ အကြံပြုချက်များအား ရေးသားဖော်ပြပေးလိုက်ပါသည်။

မဖြစ်မနေစစ်ဆေးသင့်
“လက်မထပ်ခင် သွေးစစ်တာကတော့ မဖြစ်မနေ လုပ်သင့်ပါတယ်။ တစ်ဦးနဲ့တစ်ဦး အပြန်အလှန် ယုံကြည်မှုလဲ ရှိတယ်။ နောက် မျိုးဆက်တွေအတွက်လဲ လုံခြုံစိတ်ချရတယ်။ အရင်တုန်းကတော့ ဆစ်ဖလစ်လောက်ပဲ ကြောက်စရာရှိတာ အခုကျတော့ HIV တို့ ဘီပိုး၊ စီပိုး အဲဒါတွေကလဲ မိခင်ကနေ ကလေးကို ကူးစက်တတ်တဲ့အတွက် အဲဒါတွေကို ကြိုတင်ကာကွယ်လို့ရတာတွေ ရှိပါတယ်” ဟု အထွေထွေ ရောဂါကုဆရာဝန် ဒေါက်တာမျိုးညွန့်က ပြောသည်။

လက်မထပ်မီ သွေးစစ်ခြင်းကိုမည်သည့်လူတန်းစားမဆို ပြုလုပ်သင့်ရာ အဆိုပါကိစ္စနှင့်ပတ်သက်ပြီး အလေ့အကျင့်များ ရရှိနိုင်စေရန် လူထုများအား အသိပညာများ ပေးသင့်ကြောင်း သိရသည်။ “လက်မထပ်ခင် စစ်ဆေးမှုတွေ လုပ်တာကတော့ အရင်ကထက်ပိုများလာပါတယ်။ လူတွေက အသိပညာ တိုးတက်များပြားလာတာနဲ့အမျှ ကျန်းမာရေး အသိပညာတွေက ပိုများလာကြပါတယ်” ဟု ယင်းကဆိုသည်။

မျိုးဆက်များအတွက်ပါ
ကောင်းမွန်တဲ့အမူအကျင့်ဖြစ် “လက်မထက်ခင် သွေးစစ်တာတွေ၊ ဆီး
စစ်တာတွေကို ပြီးခဲ့တဲ့နှစ်တွေကထက် ပိုပြီးတော့ လုပ်လာကြတယ်။ အခုလိုစစ်ဆေးကြတာ တော်တော်လေး ကောင်းပါတယ်။ ဒါတွေက ကိုယ်တစ်ယောက်တည်းအတွက်တင်မကဘူး။ ကိုယ်နဲ့ ပေါင်းဖက်မယ့်သူ ကိုယ့်ရဲ့မျိုးဆက်ဖြစ်တဲ့ သား၊ သမီးများအတွက်ပါ ကောင်းတဲ့ အမူအကျင့်လေးပါ” ဟု ဒေါက်တာမျိုးညွန့်က ပြောသည်။

ဘာတွေစစ်ဆေးရမလဲ
ယင်းစစ်ဆေးမှုများတွင် သွေးအားနည်းမနည်း သိရှိနိုင်ရန် စစ်ဆေးခြင်း၊ သွေးအမျိုးအစားခွဲခြားခြင်း၊ သွေးချို၊ ဆီးချိုစစ်ဆေးခြင်းများ၊ ကာလသားရောဂါ စစ်ဆေးခြင်း၊ ဘီပိုး၊ စီပိုးစစ်ဆေးခြင်း၊ HIV ပိုးရှိမရှိ စစ်ဆေးခြင်း၊ ဆီးစစ်ခြင်းနှင့် အသည်းရောင်အသားဝါ
ဘီပိုး ကာကွယ်ဆေးထိုးထားသူများအတွက် ဆေးအောင်မအောင် စစ်ဆေးခြင်းများကို ပြုလုပ်သင့်ကြောင်း သိရသည်။

“ပုံမှန်အားဖြင့်တော့ သွေးဖြူဥ၊ သွေးနီဥတွေ စစ်ဆေးပေးတယ်။ သွေးအမျိုးအစား၊ ဘီပိုး၊ စီပိုး၊
HIV၊ ကာလသားရောဂါရှိမရှိကို စစ်ဆေးကြတယ်။ သွေးစစ်ကြတာကတော့ အရင်နှစ်တွေကထက် ပိုပြီးတော့ များလာကြပါတယ်” ဟု SML အဆင့်မြင့်ရောဂါရှာဖွေရေးနှင့် အထူးကုဆေးခန်းမှ တာဝန်ခံ မဂျူးဂျူးက ပြောသည်။

အဆိုပါ ပုံမှန်စစ်ဆေးမှုများအတွက် တစ်ကြိမ်လျှင် ၄၇၃၀၀ ကျပ်နှင့် ဘီပိုးနှင့် HIV စစ်ဆေးခြင်း
အတွက် ၁၇၀၀၀ ကျပ်ကျသင့်မည်ဖြစ်ကြောင်း သိရသည်။

ဆီးချို၊ သွေးချိုရှိမရှိ စစ်ဆေးသင့်
“ဆီးချို၊ သွေးချိုရောဂါတွေလဲ စစ်ဆေးသင့်တယ်။ ဘာလို့လဲဆိုတော့ မွေးလာတဲ့ကလေးမှာ ဆီးချိုပါလာရင် မိခင်ကိုလဲ ဒုက္ခပေးမယ်။ မွေးလာတဲ့ကလေးမှာလဲ ဆီးချိုဖြစ်နိုင်တယ်။

အခုလိုကြိုတင်စစ်ဆေးထားတော့ အကယ်၍များ ဆီးချိုရှိနေရင် တတ်ကျွမ်းနားလည်တဲ့ ဆရာဝန်တွေထံကနေပြီးတော့ အကြံဉာဏ်တွေကို ယူသင့်တယ်” ဟု ယင်းကဆက်လက်ပြော
သည်။

VDRL (ကာလသားရောဂါစစ်ဆေးခြင်း) ကလေးရရှိသည့်အချိန် မိခင်တွင် ကာလသားရောဂါ ဖြစ်ပွားပါက ဆေးကုသရာတွင် အခက်အခဲရှိတတ်သည့် ကြိုတင်စစ်ဆေးသင့်သည့် ရောဂါတစ်မျိုးပင်ဖြစ်ကြောင်း သိရသည်။ “မစစ်ဘဲနဲ့ ကလေးယူမိပြီး ကာလသားရောဂါရှိနေမယ်ဆိုရင် ဆေးတွေက ကလေးကို မထိခိုက်ဘူးလို့ ပြောလို့မရဘူး။ အချင်းကနေ ကလေးကို အနည်းငယ်တော့ ထိခိုက်နိုင်တယ်” ဟုပြောသည်။

ဘီပိုး၊ စီပိုး စစ်ဆေးခြင်း
ဘီပိုးရှိနေသူများအနေဖြင့်လည်း မိမိအိမ်ထောင်ဖက်နှင့် ကလေးကို ကူးစက်ခြင်းမရှိစေရန် ကြိုတင် ဆေးစစ်ကာ သက်ဆိုင်ရာဆရာဝန်ကြီးများနှင့် တိုင်ပင်သင့်ကြောင်း သိရသည်။
“ဘီပိုးရှိပြီဆိုရင်လဲ ဒီဘီပိုးက အခြားသူကို ကူးစက်နိုင်လား၊ မကူးစက်နိုင်ဘူးလားဆိုတာကို အသည်း ဆရာဝန်ကြီးတွေနဲ့ တိုင်ပင်သင့်တယ်။ ဘီပိုးက ကိုယ့်အိမ်ထောင်ဘက်ကိုလဲ ကူးနိုင်တယ်။ ကလေးကိုလဲ ကူးနိုင်တာကြောင့်ပါ။ စီပိုးကတော့ သာမန်ဆို အိမ်ထောင်ဖက်နဲ့ကလေးကို ကူးခဲပါတယ်” ဟု ပြောသည်။

HIV စစ်ဆေးခြင်း
HIV ရှိနေပြီဆိုပါက လက်ထပ်သင့်၊ မထပ်သင့် လက်ထပ်ပြီးပါကလည်း ကလေးယူသင့် မယူသင့်သည်များကို သက်ဆိုင်ရာ ဆရာဝန်များနှင့် တိုင်ပင်ဆွေးနွေးသင့်ကြောင်း သိရသည်။
HIV ရှိနေတာကို သိသော်လည်း လက်ထပ်ချင်သည်ဆိုပါက စသိသည်မှစ၍ ကာကွယ်နည်းများကို သက်ဆိုင်ရာ တတ်ကျွမ်းနားလည်သည့် ဆရာဝန်များနှင့် တိုင်ပင်ပြီး အစစအရာရာ ကြိုတင်ပြင်ဆင်သင့်ကြောင်း သိရသည်။

သို့ဖြစ်ရာ လက်မထပ်မီ သွေးစစ်ခြင်းအတွက် ပေးလိုက်ရသည့်အချိန်က တစ်ဘဝစာကောင်းဖို့အတွက်နှင့် နှိုင်းယှဉ်ပါက ပြောပလောက်စရာ ဖြစ်မည်မဟုတ်ပါ။ ယင်းသို့ အချိန်အနည်းငယ် ဖဲ့ပေးလိုက်ရခြင်းက အနာဂတ်တွင် ကျန်းမာရေးအတွက် လုံခြုံစိတ်ချရသော ပျော်ရွှင်ဖွယ်ရာ "မိသားစုဘဝ” ကို ပိုင်ဆိုင်စေနိုင်မည် ဖြစ်ပါကြောင်း ရေးသားလိုက်ရပါသည်။


Credit : Democracy Today Daily