" ဖခင်မေတ္တာ "
ဒီနေ့ ကျွန်တော် ဖတ်ရတဲ့ အကြိုက်ဆုံး စာတစ်ပုဒ်ပါ။
ပုံလေးကတော့ .. သားသမီးတွေနဲ့ အတူ
မိသားစုကို မြင်ယောင်ရင်းနဲ့ ငွေတစ်ခုအတွက်...
မာနတွေကို ဖယ်ထားပြီး သူများဖိနပ်ကိုတောင်
လျှာနဲ့ ကုန်းယက်ပေးနေတဲ့ ပုံပါ။
အားလုံးပဲ ပြီးဆုံးသည်အထိ ဖတ်ကြည့်နိုင်ကြပါစေလို့ ဆုတောင်းရင်း.. ..
ဖခင်မေတ္တာ
°°°°°°°°°°°°°
ဖခင်ဖြစ်တဲ့ အမျိုးသားအများစုဟာ လုပ်ငန်းခွင်မှာဆို သားသမီးတွေအတွက် ဒေါသတွေ၊ မာနတွေကို မကြာခဏ မျိုချတတ်ရပါတယ်။ အမျိုးသားတွေပီပီ သူတို့ကြိုက်တတ်တဲ့ အကြိုက်တွေကို လျှော့ချရပါတယ်။
စကားမစပ် ပြောရရင် နှစ်ပေါင်းများစွာ စွဲသောက်လာတဲ့ ဆေးလိပ်ကို ရောဂါကြောင့်
မဟုတ်ဘဲ ဒီအတိုင်း တိခနဲဖြတ်ဖို့ဆိုတာဟာ အရမ်းခက်တယ်ဆိုတာ တော်တော်များများ သိမှာပါ။
ဒါပေမဲ့ ကျွန်တော် အဝေးမှာ အလုပ်လုပ်တုန်းက အဲ့ဒီနိုင်ငံသား သူငယ်ချင်းဟာ သူ့ရဲ့ ၄ ယောက်မြောက် သမီးလေးကို သူ့ဇနီးက မွေးလိုက်တဲ့အချိန်မှာ တိခနဲ ဖြတ်လိုက်တာ
မြင်ဖူးတယ်။
သူက စက်ရုံမှာဆို ကင်တင်းဆင်းပြီး ကျွန်တော်နဲ့အတူတူ ဆေးလိပ်ထွက်သောက်နေကျ၊ ကျွန်တော့်နဲ့ဋ္ဌာနတူမို့ အရင်က တစ်နေ့ကို တစ်ဘူးနီးပါးသောက်တတ်တဲ့သူ့ကို ဘာဖြစ်လို့လဲလို့ တအံ့တသြမေးမိတော့...
ဆေးလိပ်တစ်ဘူး ၁၀။ တစ်လ သုံးရာ။ ငါအကုန် မခံနိုင်တော့ဘူး။ လစာက မတိုးပေမယ့် သမီးလေးတစ်ယောက် ငါ့လောကထဲကို ထပ်ရောက်လာပြီ။ သူ့အတွက် စားရိတ်ကို ငါ့စီးကရက်မသောက်တော့ဘဲ စုထားရတော့မယ်လို့ ပြန်ပြောခဲ့ဖူးပါတယ်။ နောက် ဆေးလိပ်သောက်တဲ့ ကျွန်တော်တို့နားမှာနေရင် ဆေးလိပ် ပြန်သောက်ချင်မှာစိုးလို့ဆိုပြီး ထမင်းစားချိန်တွေမှာဆို စားပြီးရင် ကျွန်တော်တို့နဲ့ ဝေးရာ ခုံလေးတစ်ခုံမှာ တစ်ကျပ်တန်ပီကေလေးကို မြုံ့ရင်း သူတစ်ယောက်တည်း ကြိုးစားနေပါတယ်။
နောက်ကျတော့လည်း သားသမီးကိုချစ်စိတ်က ဆေးလိပ်သောက်ချင်စိတ်ကို အောင်နိုင်သွားစေခဲ့ပါတယ်။ ဒါပေမဲ့ ကျွန်တော်မနေနိုင်မထိုင်နိုင် တွေးမိသေးပါတယ်။ ဆေးလိပ်ဖြတ်စက သူဘယ်လောက်တောင် စိတ်ဆင်းရဲခဲ့ရမလဲလို့ပါပဲ။
နောက်တစ်ယောက်ကျတော့လည်း အသက် လေးဆယ့်ငါးကျော် ငါးဆယ်နားနီးနေတဲ့ ဦးလေးတစ်ယောက်ပါ။ သူက ဧရာဝတီတိုင်းက။ ဒါပေမဲ့ ပတ်စ်ပို့စာအုပ်ထဲမှာ အသက်လိမ်ပြီး အလုပ်လာလုပ်တာပါ။
စကားလည်း သိပ်မပြောတတ်တော့ သူ့ဋ္ဌာနမှာ နိုင်ငံခြားသားတွေကြား ခဏခဏ လှောင်ခံရပါတယ်။ ဒါပေမဲ့ သူသိပ်သည်းခံတယ်။ ထမင်းစားရင်လည်း စက်ရုံကပေးတဲ့ ထမင်းဖိုးနဲ့ ကင်တင်းန်မှာရောင်းတဲ့ ထမင်းကို ဘယ်တော့မှ ဝယ်မစားပါဘူး။ သက်သာအောင်ဆိုပြီး တစ်ကျပ်ဖိုး လေးလုံးလောက်ရတဲ့ ကြက်ဥကို တစ်နေ့တစ်လုံးပြုတ်။ နောက် အဲ့ဒီ ကြက်ဥပြုတ်လေးတစ်လုံးကို ထမင်းဆီဆမ်းလေးနဲ့ ကော်ထမင်းဘူးလေးထဲ သူ့အဆောင်ကနေ ထည့်လာပြီး ၃နှစ် လုံးလုံး ကျွန်တော်နဲ့ကြုံတိုင်း ကျွန်တော့်ရှေ့မှာ အဲ့ဒီလို စားသွားသူပါ။ ကျွန်တော်ကကြုံတိုင်း မနေနိုင်လို့ သူ့ကို ကျွန်တော့်ပန်းကန်ထဲက ဟင်းတွေ
ထည့်ပေးရင်တောင်မှ သူက မထည့်ပေးပါနဲ့ဗျာ။ တစ်ခါစားရရင် နောက် စားချင်လာလိမ့်မယ်။ အဲ့ဒီအခါ ကျွန်တော်ပိုက်ဆံ အပိုကုန်လိမ့်မယ်။ ကျွန်တော့်သမီးလေးက ဆယ်တန်းအောင်ထားပြီဗျ။ အမှတ်လည်းနည်းနည်းကောင်းတယ်။ ကျွန်တော်တစ်ယောက်လုံးရှိရဲ့နဲ့ သမီးလေးကို သူများအထောက်အပံ့နဲ့ မျက်နှာငယ်ခံပြီး ကျောင်းမတက်စေချင်ဘူး။ သူ့ကျောင်းစားရိတ်အတွက် ကျွန်တော်ကြိုးစားစုမှ ဖြစ်မှာ။ အသက်ကလည်း နည်းနည်းထောက်လာပြီဆိုတော့ ဒီမှာလည်း ကြာကြာ မလုပ်နိုင်ဘူးလေ။ သုံးနှစ်တည်း ကျွန်တော် ဒီလိုစားမှာပါ။ ကြက်ဥပြုတ်၊ ကြက်ဥကြော်၊ ကန်စွန်းရွက်ကြော်၊ ပဲပင်ပေါက်ကြော်ပေါ့။ ဒါပေမဲ့ မြန်မာပြည်ပြန်ရောက်ရင်တော့ မိန်းမချက်ကျွေးတာကို ကောင်းကောင်းစားပါ့မယ်ဗျာ လို့ ဟာသလေးနဲ့ ပြောသွားတာ ကြုံခဲ့ဖူးပါသေးတယ်။
တကယ်ပါပဲ။ ပြောရမယ်ဆို ဖခင်တော်တော်များများဟာ သူတို့အပြင်မှာ နစ်နာခဲ့။ ဆုံးရှုံးခဲ့။ စော်ကားခံခဲ့။ စွန့်လွှတ်ခဲ့ရတာတွေကို သားသမီးတွေမသိအောင် သိုဝှက်ခံစားတတ်ကြတဲ့ ထူးဆန်းတဲ့ လူမျိုးတွေပါပဲ။ ပေးဆပ်ကြတာတွေကိုလည်း သိပ်ထုတ်မပြောချင်တတ်ကြပါဘူး။
လူမြင်အောင် သနားစဖွယ် မျက်ရည်မကျပေမယ့်။ လူသိရှင်ကြား ဝေဒနာတွေကို ကြေငြာခွင့်မရကြပေမယ့်၊ စွဲလမ်းမှုတွေကို တိတ်တဆိတ်ကြိတ်ပြီး စွန့်လွှတ်လိုက်ရလို့ ရူးသွပ်ချင်လောက်တဲ့ ခါးသီးစရာ အတွေ့အကြုံတွေ၊ နာကျင်ဖွယ်ခံစားချက်တွေ...
စတာတွေနဲ့ တရိရိ အထပ်ထပ်မွှန်းခံရလို့ သူတို့ရဲ့နှလုံးသားတစ်ခုလုံး ရစရာတောင် ရှိရဲ့လားလို့တောင် တစ်ခါတစ်ခါ ဖခင်တစ်ယောက် မဖြစ်သေးတဲ့ ကျွန်တော် တွေးကြည့်မိပါတယ်။ ဒါပေမဲ့ သူတို့သားသမီးတွေ အဆင်ပြေ အောင်မြင်ပျော်ရွှင်ပြီး ဝဝလင်လင်စားရ၊ လှလှပပ ဝတ်ရတဲ့အခါ ဖြစ်လာတဲ့ ပီတိစိတ်က စောစောကဒဏ်ရာတွေကို ပြန်ကုစားသွားသလားရယ်လို့ အခြားတစ်ဖက်က စဉ်းစားမိရပါသေးတယ်။
ကျန်းမာရေးနဲ့ မညီညွတ်တဲ့ လုပ်ငန်းခွင်မှာ သားသမီးတွေ စားဝတ်နေရေး၊ ပညာရေး စတာတွေကြောင့် အလုပ်တွေလုပ်ရင်း စောစီးစွာ ကြွေလွင့်သွားရတဲ့ ဖခင်တွေလည်း လောကကြီးထဲမှာ မရေတွက်နိုင်လောက်အောင် ဒုနဲ့ဒေးနေမှပါပဲ။
ဘာပဲဖြစ်ဖြစ်ပါ။ ထူးဆန်းတဲ့ လူသားတွေလို့ ကျွန်တော်မြင်မိ တွေးမိတဲ့ အလွှာအသီးသီး၊ လုပ်ငန်းခွင်အမျိုးမျိုးက ဖခင်စစ်စစ်တွေဟာ အရင်ကလည်း ရှိခဲ့တယ်။ အခုလည်း ရှိနေခဲ့တယ်။ နောက်လည်း ရှိနေခဲ့လိမ့်ဦးမယ်လို့ ကျွန်တော့်ရင်ထဲ ယုံကြည်ရင်းနဲ့...
ဏီလင်းညို
No comments:
Post a Comment