" အဲ့ဒါလာပြောတာ "
နေ့တိုင်း မဖြစ်မနေလုပ်ရသော အလုပ်များ ထဲတွင် စကားပြောခြင်း အလုပ်တစ်ခုသည်လည်း အပါအဝင် ဖြစ်သည်။ လူမှုနယ်ပယ်ထဲတွင် ကျင်လည်နေသူ မှန်သမျှ မဖြစ်မနေ စကားတွေကို ပုံသဏ္ဌာန်မျိုးစုံဖြင့် ပြောဖြစ်နေကြသည်။ တစ်ယောက်မျက်နှာ တစ်ယောက်ကြည့်၍ ပြောသည်။ တိုးတိုးပြောသည်။ ကျယ်ကျယ်ပြောသည်။ အော်ပြီးပြောသည်။ သည်တိုင်းပြောတာ အားမရသဖြင့် တယ်လီဖုန်းဖြင့် ပြောသည်။ ကြေးနန်းဖြင့်ပြောသည်။ SMS စာတိုရိုက်၍ပြောသည်။
တစ်နေ့တစ်နေ့ ကျွန်တော်တို့ ပြောပြောနေ သောစကားလုံးများကို မှတ်တမ်းလုပ်ထားလျှင် အရေအတွက်ပေါင်း နည်းမည်မထင်။ ထိုမနည်းမနော ပြောဖြစ်ခဲ့သော စကားများထဲတွင် အကျိုးရှိသော စကားက ဘယ်နှခွန်း၊ အကျိုးမဲ့သောစကားဟာ ဘယ်နှခွန်း ဟူ၍ မစောကြောမိကြ။ သည်လိုပဲ အမှုမှတ်မဲ့နေရင်းဖြင့်သာ စကားတွေကို မမောနိုင်မပမ်းနိုင် ပြောပြီးရင်း ပြောနေကြသည်သာ။
မကြာသေးမီ နှစ်များကစ၍ ကျွန်တော်တို့အတွက် စကားပြောစရာ နေရာသစ်တစ်ခု ထပ်ပေါ်လာ ပြန်သည်။ ဖေ့စ်ဘွတ်ခ်ဟုခေါ်သော လူမှုကွန်ရက် စာမျက်နှာ ဖြစ်သည်။ ထိုအပေါ်တွင် ကျွန်တော်တို့ တက် တက်ပြီး စကားတွေ ပြောကြပြန်ပါသည်။ ကိုယ့်ကိုယ်ပိုင် စာမျက်နှာဖန်တီး၍ ပြောသည်။ ကိုယ့်သူငယ်ချင်း အချင်းချင်း Chat Box ဟုခေါ်သော နေရာလေးမှာ သွားပြောသည်။ သူများတင်ထားသော ပို့စ်အောက်က Comment ဟူသော နေရာလေးမှာ ဝင်ပြောသည်။
ထိုသို့ ပြောကြရင်း ဆိုကြရင်းဖြင့် လူမှုကွန်ရက် စာမျက်နှာသည် ပျိုတိုင်းကြိုက်သည့် နှင်းဆီခိုင် ဖြစ်လာခဲ့သည်။ ထိုစာမျက်နှာကို တချို့က ရိုးရိုးသားသား အသုံးပြုသော်လည်း တချို့ကမူ ရည်ရွယ်ချက် တစ်စုံတစ်ရာဖြင့် အသုံးပြုသည်များလည်း ရှိလာသည်ကို တွေ့ရသည်။ ယခုနောက်ပိုင်း ပိုဆိုးလာသည်ကို သတိထားဖြစ်သည်။ ပုဂ္ဂိုလ်ရေး အမုန်းစကားများကို ခပ်စိပ်စိပ် တွေ့လာရသည်။ တစ်ခါတစ်ရံ အဖွဲ့အစည်းများ၏ စကားစစ်ထိုးပွဲများကိုလည်း ဖေ့စ်ဘွတ်ခ်စာမျက်နှာတွင် ဖတ်နေရသည်။
လေ့လာစေ့ငုသူများ၏ အဆိုအရမူ တချို့တချို့သော ပဋိပက္ခ အကြမ်းဖက်မှုများသည် ဖေ့စ်ဘွတ်ခ် စာမျက်နှာပေါ်တွင် ပြောဆိုခဲ့သော စကားများမှ မြစ်ဖျားခံသည်ဟုဆို၏။ သည်အတိုင်းဆိုလျှင် သည်စာမျက်နှာကို မိမိတို့ သတိထားရတော့မည်။ သည်စာမျက်နှာပေါ်သို့ ရောက်လာသည့် သတင်းတိုင်း၊ စကားတိုင်းကို ကျွန်တော်တို့ ဝေဖန်စိစစ်ရတော့မည်။
ဒါဆိုလျှင် ကျွန်တော်အပါအဝင် သူသူငါငါ လူတကာတို့ ဘယ်လိုစကားတွေကို ပြောဆိုနေကြပါသနည်း။ မြတ်စွာဘုရားရှင်၏ ကောင်းသောစကားကိုသာ ပြောဆိုတော်မူတတ်သော 'သုဂတော' ဂုဏ်တော်ကို မြစ် ဖျားခံ၍ ''စကားခြောက်ခွန်း၊ လူ၌ထွန်း၊ လေးခွန်းကိုပယ် နှစ်ခွန်းတွယ်'' ဆိုသော အဆိုအမိန့်တစ်ခုရှိပါသည်။
ထိုစကားခြောက်ခွန်းမှာ
(၁)ဟုတ်မှန်၍အကျိုးရှိပြီး သူလည်း နာလိုသောစကား၊
(၂) ဟုတ်မှန်၍ အကျိုးရှိပြီး သူများ မနာလိုသောစကား၊
(၃) ဟုတ်မှန်၍ အကျိုးမရှိ သူများလည်း မကြားနာလိုသောစကား၊
(၄) မဟုတ်မမှန် အကျိုးရှိ၍ သူများ ကြားနာလိုသောစကား၊
(၅) မဟုတ်မမှန်အကျိုးမရှိ သူများ ကြားနာလိုသောစကား၊
(၆) မဟုတ်မမှန် အကျိုးလည်းမရှိ သူများလည်း မကြားနာလိုသောစကား ဟူ၍ဖြစ်သည်။
ထိုခြောက်ခွန်းထဲမှ (၁) နှင့် (၂) ကိုသာ သုံးစွဲပြောဆိုပြီး နောက်လေးခွန်းကိုမူ မပြောဆိုအပ်ဟု လာရှိပါသည်။
အွန်လိုင်းလူမှုစာမျက်နှာပေါ်တွင် ခေတ်စားလျက်ရှိသော စကားတစ်ခွန်းရှိပါသည်။
'အာ့လာ ပြောတာ' ဟူသောစကားလေးဖြစ်သည်။
ထိုသို့ပြောတိုင်း ပြောတိုင်း ကိုယ်ပြောခဲ့သော စကားသည် မေတ္တာနှင့်ယှဉ်၍ ကုသိုလ်တရားပွားစီးသောစကား ဟုတ်ပါလေစဟု ဆင်ခြင်ကြမည်ဆိုလျှင်....။
အယ်ဒီတာ
TheFlowerNews
No comments:
Post a Comment