" နွေရာသီ အုန်းစိမ်းရည် သောက်ခြင်းအကျိုး "
ရှေးလူကြီးများသည် နွေရာသီ ရောက်လာသောအခါ ကျောက်၊ ဝက်သက် စသော အပူကန်၊ အပူငုပ် ရောဂါများ ကာကွယ်နိုင်ရန် အသားမရင့်သေးသော အုန်းစိမ်းရည်ကို တိုက်လေ့ရှိသည်။ အသား တည်ခါစ ဇွန်းခြစ်ဟု ခေါ်ဆိုသော အုန်းစိမ်းရည်သည် အုန်းခြောက်ရည်နှင့်မတူ ဆန့်ကျင်ဘက် ဖြစ်သည်။ အကျိုးသွားမှာလည်းမတူ။ အုန်းခြောက်ရည် သောက်လျှင် အပူကန်ခြင်း၊ ခေါင်းကိုက်ခြင်း၊ ယားနာများထခြင်း စသော ဆိုးကျိုးများ ခံစားရလေ့ ရှိသည်။
အုန်းစိမ်းရည်နှင့် အုန်းခြောက်ရည် မတူညီသော ခြားနားချက်မှာ အုန်းရည်ပေါ်တွင် အဆီများ ဝေ့နေလျှင် အုန်းခြောက်ရည် ဖြစ်နိုင်သည်။ အရသာမှာ အချိုနှင့် အငန် ရောစပ်နေသည်။ လေသလပ် ထားလျှင် ခဏအတွင်း အချဉ်ဓာတ် ပေါက်သွားလေ့ရှိသည်။ ထို့ကြောင့် ရှေးက ဆေးဆရာကြီးများက ကျောက်၊ ဝက်သက် ရောဂါများ ကုသရာတွင် အုန်းစိမ်းရည် ချက်ချင်းမရနိုင်ပါက နတ်အုန်းသီးကဲ့သို့ အုန်းခြောက်ရည်ကို ယူပြီး မီးဖြင့် ဆူပွက်အောင်ကျိုကာ ဆေးနှင့် ရောတိုက်လေ့ ရှိသည်။
စာရေးသူသည် အလွန် ပူပြင်းသော နွေရာသီ တစ်ခုတွင် ရန်ကုန်မြို့မှ မြစ်တစ်ဖက်ကမ်းသို့ ကူးပြီး သန်လျင်မြို့ရှိ ကျောက်တန်း ရေလယ်ဘုရားသို့ သွားခဲ့ဖူးသည်။ ကျောက်တန်း ရေလယ်ဘုရား၏ တစ်ဖက်ကမ်းတွင် ခိုလှုံစရာ အရိပ်မရှိ၊ နေကလည်း ပူပြင်း နေချိန်တွင် အရိပ်မိုးပေးထားသော အုန်းစိမ်း အခိုင်လိုက်ကို ချက်ချင်းဖောက်ပြီး သောက်ရန် ရောင်းချသော ဆိုင်လေးများကို တွေ့ရသည်။ ဆိုင်ရှင် အမျိုးသမီးက ''နေပူထဲက လာရင် ရေခဲရေ မသောက်နဲ့ အပူငုပ်ပြီး လည်ချောင်းနာလိမ့်မယ်။ အုန်းစိမ်းရည် သောက်၊ အပူငြိမ်းတယ်'' ဟု ပြောသဖြင့် အုန်းစိမ်းရည် တစ်လုံးကို ပိုက်တပ်ပြီး စုပ်သောက်လိုက်သောအခါ ရင်တွင်းမှ အေးသွားပြီး အားရှိသွားသကဲ့သို့ ခံစားရပါသည်။
ဂျပန်ခေတ် ဆေးဝါး ရှားပါးသော ကာလက အားပြတ်သော လူနာများ၊ ဝမ်းလျှော၊ ဝမ်းပျက်သော လူနာများကို ဂလူးကို့စ် အချိုရည် မရှိသဖြင့် အုန်းစိမ်းကို ထိပ်မှ ကြွက်မြီးဖြုတ်ပြီး အပ်စိုက်ကာ အကြောဆေးအဖြစ် သွင်းပေးရသည်ဟု ဖတ်ရဖူးသည်။ အုန်းစိမ်းရည်၏ အစွမ်းသတ္တိမှာ အနောက်တိုင်း ဆရာဝန်များကပင် အသိအမှတ်ပြု သုံးစွဲကြရသည်။ အုန်းသီး၏ ထူးခြားချက်များမှာ အတွင်း၌ ရှိနေသော အုန်းရည်သည် မခွဲမဖောက်သမျှ ကာလပတ်လုံး ခန်းသွားသည်ဟု မရှိ၊ ချဉ်သွားသည် ဟူ၍လည်း မရှိပေ။
ယခုအခါ လူနေထူထပ်သော မြို့ကြီးများတွင် အပူရှိန် မြင့်တက်လာသဖြင့် Heat Stroke ခေါ် အပူရှပ်၍ လေဖြတ်ခြင်း၊ ဦးနှောက် သွေးကြောပေါက်ခြင်းတို့ အဖြစ်များသော ရာသီဖြစ်သည်။ ဆီးပူ၊ ဆီးအောင့် ရောဂါများလည်း အဖြစ်များသည်။ အမျိုးသမီးများတွင် မီးယပ်ဖြူဆင်း ရောဂါ၊ သွေးဆင်းလွန် သောရောဂါများ ဖြစ်လေ့ရှိသည်။ ထိုကဲ့သို့ အပူကန်၊ အပူငုပ် ရောဂါများအတွက် အုန်းစိမ်းရည်ကို သောက်ပေးခြင်းဖြင့် သက်သာစေနိုင်သည်။ အမျိုးသား လူကြီးများ ဖြစ်လေ့ရှိသော ဆီးကျိတ်ရောင် ရောဂါကိုလည်း သက်သာစေနိုင်သည်။ အုန်းစိမ်းရည်သည် အာဟာရဓာတ် ကြွယ်ဝပြီး အပူငြိမ်းရုံသာမက အရိုးအဆစ်၊ အရွတ်၊ ကြွက်သားများပါ ကောင်းစေနိုင်သော အာနိသင် အထူးရှိသည်။
ကြည်မြင့်လွင် (မုဒြာ)
#Yadanarpondaily
lutawlupyaw
No comments:
Post a Comment