"အချစ်ဆိုတာ"

Lutaw Lupyaw

"အချစ်ဆိုတာ"

အချစ်ဆိုတာ…
ပေးဆပ်ခြင်း/ စွန့်လွှတ်အနစ်နာခံခြင်း၊ ရယူပိုင်ဆိုင်လိုခြင်း။

တချို့က ကိုယ့်ချစ်သူအတွက် အရာရာကို စွန့်လွှတ် ပေးဆပ်ခဲ့ကြတယ်။ တချို့က ကိုယ့်ချစ်သူကို ရယူပိုင်ဆိုင်နိုင်ဖို့ ကြိုးစားခဲ့ကြတယ်။

အချစ်ဆိုတာကို လူတိုင်းက တစ်ယောက်တစ်မျိုးစီ အဓိပ္ပါယ် ဖွင့်ဆိုခဲ့ကြတယ်။ အချစ်ကလည်း လူတိုင်းကို တစ်ယောက်တစ်မျိုးစီ ခံစားစေနိုင်စွမ်းတယ်။ တကယ်တော့ အချစ်ဆိုတာ ဘာမှန်းမသိတဲ့ အရာတစ်ခု။ အဲဒီ ဘာမှန်းမသိတဲ့ အချစ်ကို အဓိပ္ပါယ်ဖွင့်ဆိုနိုင်ရင် အဲဒါ အချစ်မဟုတ်တော့ဘူးတဲ့။

ဒါပေမယ့် အချစ်က ကြည်နူးလှပတဲ့ ကဗျာလေးတွေကို ဖန်တီးနိုင်တယ်။ နာကျင်ကြေကွဲနေတဲ့ သံစဉ်တွေကို ပြုလုပ်နိုင်စွမ်းတယ်။ အချစ်ကြောင့် တစ်စုံတစ်ယောက် ပျော်ရွှင်နေချိန်တိုင်းမှာ တစ်စုံတစ်ယောက်ကတော့ နာကျင် ခံစားနေရမြဲပဲ။

ဝတ္ထုတစ်ပုဒ်အဖြစ် ဖန်တီးချင်တဲ့ လေးပွင့်ဆိုင် အချစ်ဇာတ်လမ်းလေးတစ်ပုဒ်…
မောင်မောင်နဲ့ မမ၊ ကိုကိုနဲ့ မိုမို။ သူတို့တွေက သွားအတူလာအတူ အမြဲရှိခဲ့တဲ့ ချစ်သူတွေ။ ချစ်သူအဆင့် ကျော်လွန်ခဲ့သူတွေ။ အကြောင်းကြောင်းကြောင့် မောင်မောင်နဲ့ မမ ဝေးခဲ့ကြသလို ကိုကိုနဲ့ မိုမိုလည်း ဝေးခဲ့ကြတယ်။ ထူးခြားစွာပဲ မောင်မောင်နဲ့ မိုမိုတို့က အရမ်းချစ်တဲ့ ချစ်သူတွေ ဖြစ်သွားကြတယ်။ အဲဒီအချိန်မှာပဲ မမက ဘ၀နဲ့ရင်းခဲ့ရသူ မိန်းမသားမို့ နာကျင် ၀မ်းနည်းနေရတယ်။ ထို့အတူပဲ ကိုကိုကလည်း အဆုံးစွန်ထိ ရည်ရွယ်ပြီး ချစ်ခဲ့ရသူမို့ ကြေကွဲခံစားနေရတယ်။

အချစ်ဆိုတာ ဘာလဲ?။ သူတို့တွေရဲ့ နေရာကနေ ခံစားကြည့်မိတယ်။ ဘယ်သူ့ကို အပြစ်တင်ရမှာလဲ။ ဘယ်သူမှားတာလဲ။ အဲဒါ အပြစ်လား။ တကယ်မှားသွားလား။ ဖတ်ခဲ့ဖူးတဲ့ စာသားလေးတစ်ခုကို သွားသတိရမိတယ်…
"အချစ်ဆိုတာ သားရေကွင်းလိုပဲ" တဲ့
နှစ်ယောက်အတူ ဆွဲထားတုန်းကတော့ ဘာမှမဖြစ်ပေမယ့် တစ်ယောက်က လွှတ်လိုက်ရင် လွှတ်လိုက်တဲ့သူက ဘာမှမဖြစ်ပေမယ့် ဆွဲထားမိတဲ့သူက နာကျင်ရတယ်။ အချစ်ဆိုတာ စွဲလမ်းသူသာ ခံစားရတယ်။ ချစ်မိသူသာ အရှုံးသမား။

အဲဒါကြောင့် အချစ်ဆိုတာကို မတွေ့ချင်ဘူး။ မချစ်ရဲဘူး။ အချစ်ရှုံးသူ မဖြစ်ချင်လို့ အချစ်ဆုံးသူ မတွေ့ချင်ဘူး။ ကိုယ်ကိုတိုင်လည်း ဘယ်သူ့ကိုမှ အရမ်းမချစ်ချင်သလို ကိုယ့်ကိုလည်း ဘယ်သူကမှ အရမ်းမချစ်စေချင်ဘူး။ ဘယ်သူ့ကိုမှ ကိုယ့်ကြောင့် မခံစားစေချင်သလို ကိုယ်လည်း ဘယ်သူ့ကြောင့်မှ မခံစားချင်ဘူး။

ဒါပေမယ့် အချစ်ဆိုတာ ဆန်းကြယ်သား။ တစ်ယောက်သောသူကို အရမ်းချစ်မိသွားပြီ။ ခံစားရမယ်ဆိုလည်း ကျေနပ်နေမှာပါ ..

Credit: Kaung Khant