"သူနဲ့ ဘယ်လိုမှ ရှေ့ဆက်ဖို့ ဖြစ်နိုင်၊ မဖြစ်နိုင် ကိုယ့်ကိုကိုယ် ဒီမေးခွန်းလေးတွေ အရင်မေးကြည့်သင့်တာ"
လူအမျိုးမျိုး စိတ်အထွေထွေမို့ ကိုယ်ချစ်ရသူ၊ ကိုယ်နဲ့တွဲနေတဲ့ ကိုယ့်ရည်းစားမှာလည်း ကိုယ်မကြိုက်တဲ့ အမူအကျင့်၊ စိတ်နေစိတ်ထားတွေ ရှိနိုင်ပါတယ်။ နှစ်ဦးသား တစ်ဦးနဲ့တစ်ဦး ဘယ်လိုမှမဖြစ်နိုင်တော့ဘူးလို့ တွေးမိတဲ့အခါ သုံးသပ်မိလေ့ရှိတဲ့ အချက်လေးတွေ ရှိပါတယ်။ ဒီတော့ အဲ့ဒီအချက်လေးတွေကို ကိုယ့်ကိုကိုယ် ပြန်မေးကြည့်ရင် ရှေ့ဆက်သွားသင့်သလဲ၊ လမ်းခွဲသင့်သလားဆိုတာ စဉ်းစားကြည့်လိုက်ပါ။
၁။ သူနဲ့ဆို ဘာလုပ်လုပ် ပြောဆိုခံနေရတာပဲ။
သူနဲ့ဆို ကိုယ်လုပ်နိုင်တယ်လို့ထင်တဲ့ အရာတွေတောင် မလုပ်နိုင်တော့လောက်အောင် ဖြစ်လာတယ်။ ယုံကြည်ချက်မရှိတော့ဘူး။ တစ်ခုခုလုပ်လိုက်တိုင်းလည်း ကိုယ့်ကို စသလိုလို၊ နောက်သလိုလိုနဲ့ လှောင်ပြောင်နေတော့တာပဲ။ အဆိုးဆုံးကတော့ ကိုယ့်ချစ်သူဖြစ်ပြီး ကိုယ့်ကို အသားကုန် ဝေဖန်တာမျိုးကိုပဲ။
၂။ သူကပဲအမှန်၊ သူကပဲအကောင်း။
နှစ်ယောက်ပြဿနာဖြစ်ပြီဆို ကိုယ့်ဘက်က ဘယ်တော့မှ ဖြေရှင်းခွင့်မရဘူး။ သူအမှန်ဆိုတာချည်းပဲ။ ရန်မဖြစ်တဲ့အချိန် ကိုယ် တစ်ခုခုခံစားနေရပြီဆိုရင်လည်း သူ ဘယ်တော့မှ နားထောင်ပေးလေ့ မရှိဘူး။ နှစ်သိမ့်ပေးဖို့ဆိုတာကလည်း ဝေးလာဝေးပဲ။ တစ်ဖက်သတ် ဆန်လွန်းတယ်။
၃။ သူနဲ့နေရတာ မပျော်တော့ပါဘူး။
တစ်ရက်၊ တစ်ရက် သူနဲ့အတူတူရှိနေရခြင်းကို စိတ်ပျက်လာတယ်။ ငြီးငွေ့တယ်ဆိုတာထက် သည်းမခံနိုင်တော့သလို ခံစားချက်မျိုးကြီး ဖြစ်လာတာ။ ပျော်လည်း မပျော်တော့ပါဘူး။ ဒီလိုမျိုး ရှေ့ဆက်ရင် နှစ်ဦးစလုံးအတွက် ပိုဆိုးကုန်တော့မယ်။
၎။ သူနဲ့အတူ ရှိနေချိန်တွေ ကိုယ့်အတွက် ဘယ်တော့မှ စိတ်သက်သက်သာသာ မဖြစ်ဘူး။
စကားပြောရင်လည်း ထိန်းထိန်းသိမ်းသိမ်း ပြောနေရတယ်။ မျက်နှာထားကိုလည်း အမြဲပြင်ထားရတယ်။ ကိုယ့်ကိုကိုယ်တော့ ငါချစ်လို့ သူ စိတ်ချမ်းသာအောင် နေပေးနေတယ်ပေါ့။ ဘေးက သူငယ်ချင်းတွေ၊ မိသားစုတွေကတောင် မင်းတို့နှစ်ယောက် ကြည့်ရတာ တစ်မျိုးပဲလို့ မေးလာကြပြီ။ သူငယ်ချင်းတွေ၊ မိသားစုဝင်တွေနဲ့ ရှိချိန်ဆို ကိုယ့်ပုံက တစ်မျိုး၊ သူနဲ့ဆို တစ်မျိုး၊ သူနဲ့ရှိနေချိန်ဆို စိတ်သက်သက်သာသာကို မရှိခဲ့တာပါ။
၅။ ကိုယ့်ရဲ့အနာဂတ်ကို ကိုယ်တိုင်ဖန်တီးဖို့၊ ပြောင်းလဲမှုတွေအတွက်လည်း ထိန်းချုပ်ခံထားရသလိုပဲ။
ကိုယ့်ဘာသာကိုယ် တိုးတက်ရာ၊ တိုးတက်ကြောင်းလေး လုပ်ချင်ရင်တောင် သူက မလုပ်စေချင်သလိုလို အမြဲပြောတယ်။ အိပ်မက်တွေ အကောင်အထည်ဖော်မယ်ဆိုရင် လှောင်ပြောင်တော့တာပဲ။ သူ့ဆီက ဘာခွန်အားမှ မရတဲ့အပြင် နင်ပြောင်းလဲလို့ မရပါဘူးဟာ ဆိုတဲ့ အထင်သေးတဲ့ စကားတွေပဲ ရနေခဲ့တာ။
ဟန်နီ
Credit: Trend Myanmar
No comments:
Post a Comment