"မျက်နှာဖုံးများ"
ကျနော်ငယ်ငယ်က ပွဲဈေးတန်းသွားရတဲ့အခါတိုင်း သိပ်ပျော်တာ။ စားချင်တဲ့မုန့်တွေလည်း စားရတယ်။ လိုချင်တဲ့ ကစားစရာတွေလည်း ဝယ်လို့ရတယ်လေ။ မျက်စိတစ်ဆုံးရှည်လျားတဲ့ ပွဲဈေးတန်းကြီးထဲ လျှောက်ရင်း ကျနော် ငေးမောလို့မဆုံးဘူး။ ပျော်ရွှင်နေတဲ့လူတွေ၊ ဆူညံနေတဲ့ဈေးဆိုင်တွေ၊ အားလုံးဟာ ကျနော့်အတွက်တော့ အသစ်အဆန်းတွေချည်း။
ပွဲဈေးတန်းရောက်တိုင်း ကျနော်သဘောအကျဆုံး ဈေးသည်က မျက်နှာဖုံးသည်ကြီးတွေပဲ။ သူတို့ဆီမှာ မျက်နှာဖုံးတွေ အများကြီးပါတယ်။ သူရဲကောင်းပုံတွေ၊ ဗီလိန်ပုံတွေ၊ ဂျိုကာပုံတွေ၊ အို မျက်နှာဖုံးတွေမှ စုံလို့ပဲ။
မျက်နှာဖုံးဘာ့ကြောင့်လုပ်တာလဲ။ မျက်နှာဖုံးက တစ်ကယ်လိုအပ်သလား။ မျက်နှာဖုံးဆိုတာ အစစ်အမှန်ကို ဖုံးကွယ်ထားဖို့လား။ ဒါတွေ ကျနော်မစဉ်းစားဘူး။ ကလေးဘဝဆိုတော့ စိတ်ထဲကလာတဲ့ခံစားမှုကိုပဲ သိတယ်။ မျက်နှာဖုံးတွေမြင်ရင် ကျနော်သဘောကျတယ်။ ဒါပဲပေါ့။
အရွယ်ရောက်လာတော့ ကျနော် လုပ်ငန်းခွင်ဝင်ရတယ်။ ဟိုတယ်ဝန်ထမ်းဘဝမှာ နှစ်တော်တော်ကြာ ကျနော်လုပ်ခဲ့ရတယ်။ တာဝန်ချိန်တိုင်းမှာ ကျနော်ပျော်ရွှင်မနေနိုင်ဘူးလေ။ ပျော်နေတဲ့အချိန်လည်း ရှိတယ်။ စိတ်ညစ်နေတဲ့အချိန်လည်း ရှိတယ်။ ဝမ်းနည်းနေတဲ့အချိန်လည်း ရှိတယ်။ ကျနော့်ရင်ထဲ ဘာပဲရှိနေနေ ကျနော်ပြုံးနေခဲ့ရတယ်။ ဝန်ဆောင်မှုပေးရတဲ့ ဝန်ထမ်းဘဝမှာ ပြုံးမနေလို့လည်း မဖြစ်ဘူးလေ။ ပြုံးနေတဲ့မျက်နှာဖုံး
တစ်ခုကို ကျနော်အမြဲတမ်း တပ်ဆင်ထားခဲ့ရတယ်။
ကျနော် ကြီးပြင်းရင့်ကျက်လာတဲ့ ဘဝ သက်တမ်းတစ်လျှောက်မှာ မျက်နှာဖုံးတွေအများကြီး ကျနော် ထပ်ကြုံခဲ့ရတယ်။ လူတွေက မျက်နှာဖုံးတွေကို အခါအားလျော်စွာ ပြောင်းလဲတပ်ဆင်ထားကြတယ်။ လူမှုဆက်ဆံရေးအတွက်၊ စီးပွားရေးအတွက်၊ အောင်မြင်မှုအတွက် စသဖြင့် လူတွေက မျက်နှာဖုံး
တွေတပ်ကြတယ်။ မျက်နှာဖုံးယဉ်ကျေးမှုဟာ လူ့အဖွဲ့အစည်းမှာ သိသိသာသာ နေရာယူလာတယ်။ ငယ်ငယ်ကပွဲဈေးတန်းတွေမှာ တွေ့ရဖူးတဲ့ ကလေးတပ်မျက်နှာဖုံးတွေလို မရိုးရှင်းတော့ဘူး။ လှည့်ဖျားမှုတွေ၊ ကောက်ကျစ်မှုတွေ၊ သူစိမ်းဆန်မှုတွေ ပါလာတယ်။
မျက်နှာဖုံးတွေကို ကျနော်သဘောမကျတော့ဘူး။ မျက်နှာဖုံးယဉ်ကျေးမှုကို ကျနော်ရွံလာတယ်။ ဝန်ဆောင်မှုပေးရတဲ့ဝန်ထမ်းဘဝကိုလည်း ကျနော်စွန့်လွှတ်ခဲ့လိုက်တယ်။ အရှိအတိုင်း ပြောတယ်။ အရှိအတိုင်းနေတယ်။ ဘယ်မျက်နှာဖုံးမှ ကျနော်ထပ်မတပ်တော့ဘူး။ ကျနော့်ကို အရိုင်းဆန်တယ်လို့ လူတွေက ဝေဖန်လာကြတယ်။
ကိစ္စမရှိပါဘူး။
ကျနော်ငယ်ငယ်တည်းက သိတယ်။
ဘယ်မျက်နှာဖုံးကိုတပ်တပ်
အသက်ရှူကျပ်တယ်လေ။
ကျနော် အသက်ဝဝရှူချင်တယ်။ ။
#စစ်နိုင်
No comments:
Post a Comment