"ရည်းစားဟောင်းက သင့်ကို သူ့ဆီ ပြန်လာဖို့ တောင်းပန်ခြင်းဟာ ဒီအချက် (၅) ချက် ကြောင့်သာ"
နှစ်ဦးသား အကြောင်းအမျိုးမျိုးကြောင့် ရှေ့ဆက်လက်တွဲသွားဖို့ မဖြစ်နိုင်တော့တာမို့ လက်တွဲဖြုတ်ခဲ့ကြပြီး ဖြစ်သလို တစ်ယောက်တစ်လမ်း နောက်လှည့်မကြည့်စတမ်း လှမ်းလျှောက်လာခဲ့ပြီးပြီ။ သင်ကလည်း သင့်ဘ၀ကိုသင် အကောင်းဆုံး ဆက်လက်ပုံဖော်ရင်း ကြုံလာခဲ့တဲ့အရာတွေကို အတွေ့အကြုံလို့ သဘောထားပြီး အနာဂတ်အတွက် ပိုမိုပြင်ဆင်လာနိုင်ခဲ့ပြီ။ အဲ့ဒီလို အချိန်မှာ လက်တွဲဖြုတ်ခဲ့တဲ့ သင့်ရည်းစားဟောင်းက သင့်ကို သူ့ဆီပြန်လာဖို့ တောင်းပန်မယ်ဆိုရင် ဒီအချက် (၅) ချက်ကြောင့်သာ ဖြစ်ပါတယ်။
၁။နှလုံးသားက မရနိုင်တော့ဘူးထင်တဲ့အရာတွေကို ပိုလိုချင်တယ်။
ကလေးဘ၀တုန်းက ကိုယ်မရတဲ့အရုပ်လေး၊ ကိုယ့်ဆီမှာမရှိတဲ့ အရုပ်လေးကို ပိုလိုချင်တတ်ကြပါတယ်။ ငါ ဒါကို ရကိုရမှဖြစ်မယ်ဆိုတဲ့ အတွေးမျိုးက ကလေးဘ၀မှာတင် အဆုံးသတ်တာ မဟုတ်ပါဘူး။ အသက်တွေရလာလေ ဒီလို စိတ်မျိုးတွေ ပိုမို ပြင်းထန်လာလေလေပါပဲ။ ခုလည်း ကိုယ် လက်လွတ်ဆုံးရှုံးလိုက်ရတော့မှ ငါ လုံးဝမရနိုင်တော့ဘူးဆိုတာ သိတော့မှ ငါ အရမ်းလိုချင်တယ်။ မရလို့မဖြစ်ဘူးဆိုတာမျိုးတွေ ခံစားလာကြရပါတယ်။ ဒီတော့ ကိုယ်မရတော့တဲ့ အရာကို ပိုလိုချင်တယ်။ ဒါဟာ အတွင်းစိတ်ရဲ့ အပြင်းအထန် ဖိအားပေးမှုကြောင့်လည်း ဖြစ်ပါတယ်။
၂။သင် ဒီလောက် မြန်မြန်ကြီး ပြောင်းလဲသွားလိမ့်မယ်လို့ သူတို့ မထင်ထားတာကြောင့်လည်း ပြန်လိုချင်တယ်။
သင်ဟာ သူနဲ့ လမ်းခွဲပြီးနောက်ပိုင်း ချက်ချင်းကြီး အရာအားလုံးကို မေ့ပစ်သွားနိုင်သလို သင်လုပ်ရမယ့်အရာတွေကို လုပ်သွားနိုင်တယ်။ လွမ်းနေတယ်၊ အသည်းကွဲနေတယ်ဆိုတာမျိုး မသိရ မမြင်ရပဲ ပျော်ပျော်ပါးပါးနဲ့ သင် လုပ်စရာရှိတဲ့အရာတွေကို ဆက်လက် လုပ်ဆောင်နေတာမျိုး သူတို့ မြင်တဲ့အခါ မယုံကြည်နိုင်ဘူး။ ဒေါသလည်းဖြစ်သလို စိတ်မကောင်းလည်း ဖြစ်နေလိမ့်မယ်။ ငါမရှိပဲ နေနိုင်ပါလားဆိုတာသိရင် လူတွေဟာ အဲ့ဒီလို ဖြစ်စေချင်မှ ဖြစ်စေချင်လိမ့်မယ်။ ဒါဟာ သဘာဝပါပဲ။ ဒီတော့ သူတို့ ပြန်ချဉ်းကပ်လာပါလိမ့်မယ်။
၃။သူတို့အမှားကို သူတို့ သိသွားတာကြောင့်လည်း ဖြစ်နိုင်ပါတယ်။
အချိန်တွေကုန်လာတဲ့အခါ အခြားတစ်ယောက်က သင့်ဆီ ချဉ်းကပ်ပြီး ချစ်ရေးဆိုလာနိုင်တာ သူတို့ မြင်လာသိလာကြတယ်။ သူ့အမှားကိုလည်း အချိန်နဲ့အမျှ ပြန်တွေးပြီး သူ သင့်အပေါ် ဘယ်လောက်လွန်သွားတယ်ဆိုတာ သူသိပြီး နောင်တရလာတဲ့အခါ၊ သင်ကလွဲပြီး သူ့အပေါ် ဘယ်သူကမှ ဒီလောက်မချစ်နိုင်တော့ဘူးဆိုတာ သိလာတဲ့အခါ သင့်ကို ပြန်လိုချင်လာတာမျိုးလည်း ရှိပါတယ်။
၎။အခြားတစ်ယောက်က သင့်လိုမချစ်နိုင်ဘူးဆိုတာ သိလို့လည်း ဖြစ်နိုင်ပါတယ်။
သင်တို့နှစ်ယောက် လမ်းခွဲလိုက်ရတဲ့ အကြောင်းအရင်းက သူ့မှာ အခြားတစ်ယောက် ရှိလာတာကြောင့်များလား။ သင့်ရည်းစားဟာ ဟိုတစ်ယောက်ကိုပဲ ပစ်တွဲလိုက်ရတော့မလား၊ သင့်ကိုပဲ တွဲရမလားဆိုတာမျိုး ဒွိဟဖြစ်နေချိန် သင်က ဒါတွေသိပြီး လမ်းခွဲလိုက်တယ် ဆိုပါစို့။ သူ့ဘက်က သင်နဲ့ ပြတ်သွားချိန်မှ ဟိုတစ်ယောက်က သင့်လောက် မကောင်းဘူးဆိုတာ သိသွားပြီး သင့်ဆီ ပြန်လာတမျိုးလည်း ရှိပါတယ်။ သင့်ကိုမရမက ပြန်တွယ်ကပ်ပြီး ချစ်ခွင့်ပြန်တောင်းတာမျိုးပေါ့။
၅။သင်ဖြတ်သွားတာကို သူမခံချင်လို့ သင့်ကို ပြန်ချဉ်းကပ်တာမျိုးပါ။
သင့်ချစ်သူက သင်က သူ့ကို ဘလိုင်းကြီး ဖြတ်သွားတာမျိုး ခံလိုက်ရလို့ မခံချင်စိတ်နဲ့ သင့်ကို ပြန်လိုက်တာမျိုးပါ။ ဒီလိုလူမျိုးတွေရဲ့ စိတ်မှာတော့ အငြိုးတွေဘာတွေ ရှိကောင်းရှိနိုင်ပါတယ်။ သင့်ကိုပြန်ချဉ်းကပ် ချစ်ရေးပြန်ဆိုပြီး သင် သူ့ကို ပြန်စိတ်ဝင်စားအောင် လုပ်မယ်။ အဲ့ဒီနောက်မှာတော့ သူက သင့်ကို ပြန်ဖြတ်မယ်ဆိုပြီး တေးထားတာမျိုးပေါ့။ ကလေးဆန်ပေမယ့် ဒီလိုလုပ်ရပ်မျိုးတွေ လုပ်တတ်တဲ့သူတွေ တစ်ပုံကြီး ရှိပါတယ်။
ဟန်နီ
Credit: Trend Myanmar
No comments:
Post a Comment