"ဗေဒင်မေးခြင်းရဲ့ ကောင်းကျိုးဆိုးကျိုး"
လူတိုင်းဟာ အနာဂတ်ကို သိခွင့်ရမယ်ဆို သိချင်ကြတာချည်းပါပဲ။ ဒါကြောင့် ဗေဒင်မေးခြင်း၊ လက္ခဏာကြည့်ခြင်း၊ ရှေ့ဖြစ်ဟောခြင်း စတာတွေဟာ ကမ္ဘာအနှံ့မှာ ခေတ်စားနေကြတာ ဖြစ်ပါတယ်။ အရှေ့တိုင်းမှာသာမက အနောက်တိုင်းမှာလည်း ဗေဒင်ပညာကို စိတ်ဝင်စားကြတဲ့သူတွေ အများကြီးပါပဲ။ အရှေ့တိုင်းမှာလိုပဲ အနောက်တိုင်းမှာလည်း သတင်းစာတွေ၊ မဂ္ဂဇင်းတွေမှာ ဗေဒင်ဟောစာတမ်းတွေ နေ့စဉ်လစဉ် ထည့်ကြပါတယ်။ တိုင်းမ် မဂ္ဂဇင်းက ဆောင်းပါးတစ်ပုဒ်မှာ ပဲရစ်မြို့တစ်မြို့တည်းမှာတင် ဗေဒင်ပညာရှင်ပေါင်း ခြောက်သောင်းခန့် ရှိတယ်လို့ ဖတ်ရဖူးပါတယ်။ အမေရိကန်သမ္မတ ရေဂင်နဲ့ သူ့ဇနီးဟာလည်း အရေးကြီးတဲ့ ဆုံးဖြတ်ချက်တွေ မချခင်မှာ အမျိုးသမီးဗေဒင်ပညာရှင်တစ်ဦးနဲ့ အမြဲပုံမှန် ဆွေးနွေးတယ်လို့ ဆိုပါတယ်။
ဗေဒင်ဟောခြင်းနဲ့ အသက်မွေးဝမ်းကျောင်းပြုသူတွေ အများကြီးရှိကြပေမဲ့ တကယ်ပညာရှင်အစစ်ကတော့ အမြဲလိုလို မတွေ့နိုင်ပါဘူး။ ဗေဒင်ပညာရှင်စစ်စစ် ဆိုတာ ဗေဒင်ပညာရပ်ကို ပိုင်နိုင်သူလည်း ဖြစ်နိုင်သလို မွေးရာပါ ဆဌမအာရုံကြောင့် ရှေ့ဖြစ်နောက်ဖြစ်ကို မြင်ရသူလည်းဖြစ်နိုင်ပါတယ်။ ပညာရှင်အစစ် ဟုတ်မဟုတ်ကိုတော့ မိမိ ဗေဒင်မေးကြည့်ရုံနဲ့ မကြာခင်မှာပဲ သိနိုင်ပါတယ်။ မိမိရဲ့ အတိတ်ကို အနီးစပ်ဆုံး မှန်ကန်အောင် ဟောနိုင်မှသာ မိမိရဲ့အနာဂတ်ကိုလည်း ဟောနိုင်မယ်မဟုတ်ပါလား။ အတိတ်ဖြစ်ရပ်တွေကို ဟောတာမမှန်ရင်တော့ ဒါဟာ ပညာရှင်အတု ဖြစ်နိုင်ပါတယ်။ ဗေဒင်ပညာကို ယုံကြည်ပြီး ပညာရှင်ကောင်းနဲ့ တွေ့ပြီး ဘ၀ရဲ့ အရေးကြီးကိစ္စတွေကို အောင်မြင်အောင် လုပ်ဆောင်နိုင်သူတွေရှိသလို အယောင်ဆောင် ပညာရှင်ရဲ့ အလိမ်အညာကိုခံရပြီး ငွေကြေးများစွာ ဆုံးရှုံးရသူတွေလည်း ရှိကြပါတယ်။
ဗေဒင်ဟောနည်းပေါင်း များစွာရှိပြီး လက္ခဏာကြည့်ဟောခြင်း၊ မွေးသက္ကရာဇ်ကို တွက်ချက်ခြင်း၊ တဲရော့ဗေဒင် ဟောခြင်း၊ ဖန်လုံးကြည့်ဟောခြင်း၊ ဖဲချပ်များဖြင့်ဟောခြင်း စသဖြင့် အများကြီးရှိပါတယ်။ ဘယ်လိုနည်းနဲ့ပဲ ဟောသည်ဖြစ်စေ စစ်မှန်တဲ့ပညာရှင်က ဟောမှသာ အကျိုးကျေးဇူးကို ရရှိမှာဖြစ်ပါတယ်။ ဗေဒင်မေးခြင်းကို စိတ်ဝင်စားသူတွေအတွက် ဗေဒင်မေးခြင်းရဲ့ ကောင်းကျိုးနဲ့ ဆိုးကျိုးများကို လေ့လာဖော်ပြပေးလိုက်ပါတယ်။
ဗေဒင်မေးခြင်းရဲ့ ကောင်းကျိုးများ
ကြိုတင်ပြင်ဆင်ခွင့်ရခြင်း -
ဗေဒင်ပညာရှင်ရဲ့ ကြိုတင်ဟောကိန်းထုတ်မှုတွေကို သိရှိထားတဲ့အခါ လိုအပ်တာတွေကို ကြိုတင် ပြင်ဆင်နိုင်မှာဖြစ်ပါတယ်။ မကောင်းတာ ဖြစ်လာမယ်ဆိုရင်လည်း ကြိုတင်ရှောင်လွှဲနိုင်သလို ကောင်းတာတွေ ဖြစ်လာမယ်ဆိုလည်း ကြိုတင် ပြင်ဆင်ထားနိုင်မှာ ဖြစ်ပါတယ်။
မိမိကိုယ်ကိုယုံကြည်မှုနဲ့ မိမိအနာဂတ်ကို စိတ်ဝင်စားမှုရှိလာခြင်း -
မှန်ကန်တိကျတဲ့ ဟောကိန်းတွေကို ဟောနိုင်တဲ့ ဗေဒင်ပညာရှင်တွေဟာ ကိုယ့်ရဲ့ အစွမ်းအစတွေကိုပါ ဖော်ထုတ် ဟောကြားနိုင်တဲ့အတွက် ကိုယ် ရှေ့ဆက်လုပ်သင့်တာတွေကို သေချာ အစီအစဉ်ချနိုင်ပါတယ်။
နေ့ရက်တိုင်းမှာ အကျိုးရှိခြင်း -
“သင်ဟာ အခွင့်အလမ်းတွေကို အမိအရ ဆုပ်ကိုင်နိုင်ပြီး ကြီးပွားအောင်မြင်မယ်” ဆိုတဲ့ ဟောကိန်းလေးတစ်ခုဟာ မနက်တိုင်း မနက်တိုင်းမှာ ကြားယောင်ပြီး နေ့သစ်တိုင်းကို ပျော်ရွှင်စွာ ဖြတ်သန်းဖို့ အားအင်တွေကိုပေးနိုင်ပါတယ်။ ဒါကြောင့် အကောင်းကိုဟောတဲ့ ဟောကိန်းတစ်ခုဟာ နေ့စဉ်နေ့တိုင်းမှာ ခွန်အားတွေ ပေးနိုင်ပါတယ်။
ဗေဒင်မေးခြင်းရဲ့ ဆိုးကျိုးများ
လှည့်စားခံရနိုင်ခြင်း -
အခွင့်အလမ်းတွေနဲ့ ဆုံးရှုံးမှုတွေဆိုတာ အနာဂတ်မှာ အမြဲ ရှိနေမှာပါပဲ။ လည်ဝယ်ပါးနပ်တဲ့ အတုအယောင် ဗေဒင်ဆရာတွေဟာ အနာဂတ်ကို ထင်ယောင်ထင်မှားဖြစ်အောင် ဟောကိန်း ထုတ်တတ်ပါတယ်။ တချို့က အထူးအောင်မြင်ကိန်း ရှိတယ်ဆိုပြီး ယတြာချေခိုင်း၊ ပူဇော်ပသခိုင်းတာရှိသလို တချို့ကလည်း ဒုက္ခရောက်ကိန်းမြင်တယ်ဆိုပြီး ယတြာချေခိုင်း၊ ပူဇော်ပသခိုင်းတာလည်း ရှိပါတယ်။
အချိန်ဖြုန်းမိခြင်း -
ဗေဒင်နဲ့ ရှေ့ဖြစ်ဟောကိန်းတွေကို အလွန်အကျွံ ယုံကြည်ခြင်း၊ လိုက်စားခြင်းဟာ အချိန်နဲ့ငွေကို ဖြုန်းတီးရာရောက်ပါတယ်။ အချိန်မီ လုပ်လိုက်သင့်တာတစ်ခုကို ဗေဒင်မတွက်ရသေးလို့ ယတြာမချေရသေးလို့ မလုပ်လိုက်တာမျိုးတောင် ရှိတတ်ကြတာ တွေ့ဖူးပါတယ်။
အားကိုးလွန်းခြင်း -
မိမိရဲ့ အနာဂတ်ကို မိမိဘာသာ ဖန်တီးရမှာကို မေ့လျော့ပြီး အရာရာ ဗေဒင်ပညာရှင်ကို အားကိုးခြင်းဟာ အစွမ်းအစကို လျော့နည်းစေပါတယ်။ ဗေဒင်ပညာကို ယုံသူလည်း ရှိသလို မယုံသူလည်းရှိပါတယ်။ အလွန်အမင်း ကိုးကွယ်သူတွေရှိသလိုပဲ ဝေဖန်ကဲ့ရဲ့သူလည်း ရှိပါတယ်။ ဒါပေမဲ့ ဗေဒင်ပညာရပ်ဆိုတာ ခိုင်ခိုင်မာမာ အမြဲရှိနေတာတော့ အသေအချာပါပဲ။ ဗေဒင်ပညာကို ယုံကြည်လက်ခံသူတွေအနေနဲ့ မိမိဘ၀အတွက် မကောင်းတာရှောင် ကောင်းတာဆောင်ဖို့ ဗေဒင်ပညာကို တစ်ဖက်တစ်လမ်းက အသုံးပြုရင်း “အတ္တာဟိ အတ္တနော နာထော” ဆိုတဲ့ ဘုရားဟောတရားတော်လိုပဲ မိမိကိုယ်သာ ကိုးကွယ်ရာလို့ ယုံကြည်သင့်ပါကြောင်း ဆွေးနွေး လိုက်ပါတယ်။
Credit: Yangon Life
No comments:
Post a Comment